Statuty Kolegium Prawników (Collegium Iuridicum) Uniwersytetu Krakowskiego z 1719 r.

Rękopis Archiwum Uniwersytetu Jagiellońskiego, sygn. 53, s. 9-10
Odczyt: Marcin Baster

In nomine Domini Amen. Leges et statuta Collegii Iuridici almae Universitatis Cracoviensis, post conflagrationem eiusdem collegii ex occasione PP. Societatis Jesu, anno Domini 1719 die 26 mensis Julii factam conscripta, necnon unanimi consensu perillustrium reverendissimi illustrium clarissimorum et admodum reverendorum dominorum doctorum et professorum supra memoratum collegium inhabitantium recepta ac approbata anno qVo ChrIstVs Leges eXpresse statVIt, et Ipse eas aDIMpLeVIt [1735] (Can. Ideo permittente. §. His ita respondetur. 25. 9. 1.).
[s. 10] Leges et statuta, quae omnium hominum constringunt vitas, intelligi ab omnibus debent, ut universi praescripto earum manifestius cognito, vel inhibita declinent, vel permissa sectentur (l. Leges sacratissimae. C. de Legib. et Constit. Princip.).

Prima salus est, rectae fidei regulam custodire et a constitutis patrum nullatenus deviare (can. prima salus. 25. 9. 1.).

Contra patrum nostrorum saluberrima agimus instituta, si quod ipsi divino statuerunt, consulto, intactum, non conservamus (can. Ideo permittente. 25. 9. 1.).

Ea, quae ab antecessoribus instituta sunt: nulla desidia negligantur, nulla dissensione violentur, nulla concertatione turbentur (arg. can. Amputato. can. Cum. piae. et can. Ecclesiasticae. 25. 9. 2.).

Non est tamen reprehensibile, si secundum varietatem temporum statuta quandoque variantur, praesertim urgente necessitate, vel evidenti utilitate (c. Non. debet. de Consangvinit. et Aftinit.).