Statuty Bursy Prawników (Długosza) Uniwersytetu Krakowskiego z 1485 r. z dodatkami z lat 1492–1579.

Rękopis Biblioteki Kórnickiej, sygn. 802, k. 33r-v
Odczyt: Marcin Baster

Anno Domini 1536. die Jovis 16 Martii in rectoratu venerabilis ac egregii domini magistri Martini de llkusch acre theologie professoris, prepositi ecclesie sancti Nicolai, facta convocacione in Bursa Canonistarum pro quibusdam defectibus eiusdem burse tam in edificiis quam inhabitantibus revidendis, emendandisque ac reformandis venerabilium ac egregiorum dominorum doctorum ac magistrorum, videlicet Jacobi de Kleparz decani, Gregorii de Stawiszyn custodis ecclesie sancti Floriani, sacre theologie professorum, Nicolai de Pokrzywnycza canonici Cracoviensis, Martini Belsze de Cracovia, Joannis de Sanok procuratoris universitatis, Mathias Lączki, archidiaconi Pomeraniensis et Philipi de Cracovia doctorum in decretis. De quorum unanimi voto de consensu per dominum rectorem memoratum, conclusum est, quod statutum precedens de censu per mediam marcam pro commutacione, seu pro medio anno de quinque cameris pocioribus solvendo, intelligi videlicet et teneri, quando duo eas inhabitant, ut sonat in fine statutum illud quod fuit, per eundem dominum rectorem ante annos fere tredecem editum. Si vero unus duntaxat fuerit in illis cameris inhabitans, extunc unam integram marcam pro medio anno equaliter illarum habitacionum solvat, nisi per doctorem universitatis nostre personaliter in eodem universitate residentem^a inhabitentur [k. 33v] vel aliqua earum inhabitetur, tunc enim per mediam duntaxat marcam, etiam si unus solus doctor in aliqua illorum manserit, censum pro medio anno solvet. Dignum enim fore censuerunt, ut doctores in universitate continue residentes et illam representantes, oneraque in mandatis rectoris et convocacionibus, aliisque officiis ferentes, majore gauderent prerogativa ultra ceteros condicione inferiores, quibus etiam, precipue emeritis universitas ipsa de gratia concedebat liberas quandam in domibus universitatis et bursis mansiones. Si^b vero tales doctores ab universitate absentes fuerint, et duntaxat habitaciones seu habitacionem in bursa tenuerint, extunc pro solito more uti alii marcam pro quolibet medio anno census solvere tenebuntur, vel aliquis eorum solvere tenebitur.

^a Słowo nadpisane. b Na prawym marginesie: a potiorib[ us] cameris [...] 48 gr. pro c[ om] mutatio.

[hasła: opłaty, senior bursy, prokurator uniwersytetu, remonty]